BareMinerals 礦物彩妝, 重臨香港

BareMinerals 礦物彩妝, 相信唔少人對佢都唔陌生, 之前係旺角 Sephora 有售, 但因 Sephora 徹離香港而無晒專櫃, 只可網上訂購, 但網上揀色困難, 當然係要親身試過先知啱唔啱自己啦, 10月開始大家有機會親身體驗啦, 因資生堂集團收購了 BareMinerals, 以香港為大中華區首站登陸, 更於金鐘太古廣場 Harvey Nichols 及尖沙咀海運大廈 Faces 正式開設美容專櫃

有幸出席 BareMinerals Launch Party, 係香港仔映灣園舉行, 我都係第一次去咋, 環境好靚, 而且品牌好細心, 安排左旅遊巴係尖沙咀/銅鑼灣接我地去, 感覺好似讀書時去旅行咁, 不過有段小插曲, 當日司機大佬唔熟路, 同我地行左個大運, 搞到我地架車係最遲先到達....



入到場內見到好多 BareMinerals 彩妝, 由底霜, 粉底, 胭脂, 眼影, 眼線, 唇膏唇彩, 到睫毛液通通有齊, 仲有 BA 幫我地試上面架, 除左彩妝, 工具/化妝掃都好齊全, 最觸目係個 BareMinerals 礦物粉既朱古力蛋糕, 可惜加左顏料, 係唔食得架, 有 d 浪費...
 

玩完彩妝, 活動開始, 由司儀楊洛婷為我地簡單介紹, 再由 Bare Escentuals 行政主席 Leslie Blodgett (右下) 及嘉賓講解 BareMinerals, 品牌是 Bare Escentuals 公司旗下以礦物為主既品牌, 由 Leslie Blodgett 於 1995年創辦, 產品採用最純淨優質成分, 獲得美國多項榮譽, 不含對皮膚有害的化學物質, 即使不卸妝, 也不會對肌膚有害, 成分天然的礦物粉底不含防腐劑, 及提供理想遮瑕效果
 

接著由星級化妝師 Gary 以 BareMinerals 礦物粉底示範, 簡單3個步驟 Swirl 打圈, Tap 輕敲, Buff 柔掃, 已幫 Model 完成靚靚底妝, 加埋胭脂及唇膏, 個樣精神晒, Model 更分享用 Bare Minerals 礦物粉, 底妝好輕好薄, 感覺唔到有化妝, 唔會令皮膚有負擔

Swirl 打圈 : 最少量 BareMinerals 礦物粉底於盒蓋 (就像是 Cappuccino 灑上的朱古力粉份量一樣) 以專用化妝掃, 於盒蓋打圈, 讓掃毛完全沾上粉底

Tap 輕敲 : 輕敲, 直至掃外圍沒有多餘粉底

Buff 柔掃 : 由外至內, 輕輕以畫圓方式柔掃, 化妝掃的掃毛應緊貼肌膚, 切勿一次最大量粉底, 如希望得到高度遮瑕效果, 應重覆數次打圈, 輕敲, 柔掃的步驟
 

大會邀請藝人 Kary 吳雨霏, 送上首張 VIP 會籍給她, Kary 更分享到英國時已大手購入 BareMinerals, 自用及送俾朋友作手信, 而佢既朋友用後亦大讚好用, 而藝人工作需長時間化妝, 所以 Kary 喜歡 BareMinerals 更因不用卸妝, 亦不會損害肌膚

發佈會完結, 離開時每人得到一份禮物, 包括妝前底霜, 礦物粉, 化妝掃, 及好有心思既 BareMinerals USB
 

本身未用過礦物粉, 得到禮物已經急不及待開黎玩啦

Prime Time Foundation Primer - Brightening 亮肌妝前底霜  $200 / 30ml
專為改善乾燥、粗糙、幼紋、油脂過剩、粗大毛孔等各種肌膚問題而設, 具珍珠粉末閃亮效果, 令肌膚平滑光澤 (另有 Original 及 Oil Control 2款選擇)

用後感 : 雖然吱出黎係肉色, 但搽上面無咩色, 質地好滑, 推勻後皮膚好順滑, 可以令礦物粉更貼面持久, 而且補濕效果唔錯, 不過有閃粉, 鼻既毛孔就唔係好遮到

Prime Time Eyelid Primer - Brightening 亮澤眼部特妝底霜  $180 / 3ml
有效完全提升礦物眼影的著色度及貼服度, 有效平衡眼部油份並防止眼妝出現摺痕和不均勻情況, 令眼妝更持久 (另有 Orignial 及 Brightening Pearl 2款選擇)

用後感 : 閃亮啡金色, 可用於眼部打底, 不過我覺得單用都可以, 但我無礦物眼影, 所以試唔到佢既效果
 

Full Flawless Face Brush 面部化妝掃 (高度遮瑕)  $215
嚴選最高質素的毛質, 同時為配合 BareMinerals 產品而精心設計, 無論掃毛質料、剪裁以至密度都一絲不苟, 準確地控適當使用份量, 適合用於礦物粉底、礦物定妝粉及各款礦物面部彩妝產品

用後感 : 睇毛質好似好拮咁, 但其實係好滑, 完全唔拮面, 而且設計啱晒使用礦物粉底之用
 

Original SPF 15 Foundation 透亮礦物粉底  $250 / 8g (全12色)
保護肌膚同時締造如素肌一樣的自然亮滑妝效, 粉末外表, 乳霜觸感, 有效撫平幼紋和皺紋, 令肌膚保持滋潤

我膚色偏白, 呢款係 fairly light 適合略為偏紅既明亮膚色, 首次打開時要取出保護膠, 使用時可向左右扭調效開關, 亦可半開啟小孔, 咁就唔會倒出過量粉底

用後感 : 倒出少量, Swirl 打圈, Tap 輕敲, Buff 柔掃, 方便簡單, 係控制份量要有少少技巧, 不過用多幾次就無問題, 掃幾下就完成底妝, 好方便, 中度遮瑕效果, 但妝效好薄好自然, 連宅男都話唔似搽左粉, 不過毛孔位要小心 d 上, 份量過多會令毛孔明顯
 

Matte SPF 15 Foundation 啞緻活膚礦物粉底  $275 / 6g (全12色)
革命性粉底有效吸走多餘油脂, 令油光絕跡, 同時保持肌膚整天水潤, 締造持久自然啞緻美肌

用後感 : 同 Original 都係 fairly light, 但肉眼睇就深色少少, 因 matte 感, 只掃少量係 T zone 位置, 減少出油令妝容更持久, 所以我會用上細少少既掃上, 用法都係一樣



Mineral Veil Finishing Powder 礦物定妝粉  $200 / 9g (共6款)
為肌膚帶來輕盈無瑕效果, 是你從早到晚都保持著上鏡粧容的秘訣, 吸走多餘油分之餘, 同時遮蓋幼紋和收細毛孔, 賦予臉龐如透紗般的水漾剔透粧感, 令肌膚整天都煥發光澤透亮, 再見油光。具備透亮、保濕、光感、調色和防曬SPF25產品以供選擇

用後感 : 粉質較 Origins 及 Matte 細緻, 本身之前上既 Origins 礦物粉已經係粉狀, 所以 Mineral Veil 定妝粉唔需要好似平時上碎粉咁用好多, 少量已 ok, 拎出街補妝都好方便
 

用左妝前底霜及 3款礦物粉底, 效果如上圖, 淡既印及斑都遮到, 而且皮膚睇落平滑左, 帶有少少自然光澤感, 好自然唔厚妝, 不過有暗瘡既話會比用粉底液覺眼, 所以最好用 d 修飾霜打底先, 搽完 Primer 後, 最好待數分鐘等皮膚完全清爽先上礦物粉, 會順滑 d 無咁易 kick 粉

呢篇文打左好耐.... 睇左咁多資料, 有興趣就快 d 去 Harvey Nichols 及 Faces 睇下啦