囍宴

噚日係個識左無十年都有八年既朋友結婚, 大家一齊成長, 見到佢結婚真係好開心好感動, 我著左新買條裙, 著上身條裙原來都幾短下... 行得快又有風既話, 真係好驚走光呀...

晏晝就係教堂行禮, 同另一個 fd 約係地鐵站等, 但搵左好耐都搵唔到, 問人都唔知係邊... 好驚趕唔切呀, 好彩最後都搵到, 雖然我係無神論者... 但睇到佢地互相相愛, 向神許下承諾既一刻 , 都有少少眼濕濕架...

新娘真係好靚, 但同時又有少少陌生咁... 我個都係天生麗質, 平時都唔多打扮, 真係未見過佢化妝 set 頭個樣掛, haha, 但出門口太衝忙, 唔記得帶相機呀, 激死, 好彩而家科技先進, 用電話同佢影左幾張相留念咋。

跟 住去 cwb 行左陣, 食少少野就去酒店啦, 但一對新人都太忙, 理唔到我地... 但今次佢地真係好有心機搞呢個婚禮, 好多方面都睇得出佢地既細心, 由小禮物係印有佢地個樣, 名, 婚禮日期既 M & M, 真係好得意架。仲有好多節目添, 新郎新娘跳左 part 舞, 然後戲肉就黎啦, 新人加兄弟姊妹團排左 MJ 既 Thriller 真係全晚高潮, 睇到好開心又特別, 新郎仲係 mix, 個樣都幾似 d 彊屍伯爵, 呢隻舞真係啱晒佢, 哈哈!!!

新 郎全家真係為左今次婚禮洗出混身解數, 食左幾味菜又到新郎媽咪出場唱歌, haha, 好勁呀, 睇到 d 長輩好 high 添, 然後新郎妹妹做左個城堡形既結婚蛋糕, 我初初仲以為假架, haha, 佢為左呢個蛋糕籌備左一個月架, 我地都擔心個蛋糕唔會放左一個月掛... haha, 但係好好味架, 只係太飽食唔落咋...