Eyeliner 比拼 - Solone vs Royal Lady 眼線膠筆

平日較少化眼妝, 有時都有畫眉 + Mascara, eyeliner 就較少, 但當然上網見有人話好用, 都會買黎看門口啦, 之前有 blog 友介紹好出名既 Solone, 但我買錯左 Royal Lady, 係台灣時見到 Solone 就買左, 所以黎個比拼先

左 : Royal Lady 魅惑眼線膠筆 - 銀炫黑
右 : Solone 防水眼線膠筆 - 04 金鑽黑
 

無論包裝及筆身外型都好似, 難怪我會買錯, 價錢方面 Royal Lady 平少少, 大約 $25-30, 而 Solone 就 $30-35, 但 Solone 連埋筆刨, 為返其實差唔多
 

都係要刨既鉛筆狀, 不過 Royal Lady 筆芯較軟, 有時大大畫好易斷
 

Royal Lady : 黑色, 有銀色亮片, 亮片較大粒, 所以畫出黎唔覺好黑色, 由於亮片大, 唔算好順滑, 用係近眼睫位會感到亮片刮到眼皮, 而且放得一段時間, 筆芯好似乾乾地, 有點變硬左, 好難畫

Solone : 黑色, 金色珠光, 都唔會好黑, 反光時 d 似墨綠色, 筆芯軟 d 較順滑, 新買無耐, 亦好少用, 唔知有冇變乾問題
 

沖水 : 2款都無甩
用紙巾印 : 都係無事, 完好無缺, 紙巾亦無任何顏色
用手捽 : Royal Lady 有 d 化開, 而 Solone 依然完封不動



再測試下易唔易卸先
Royal Lady : 用卸妝水抹左 10下已經甩左 9成啦, 再抹多幾下就甩晒
Solone : 抹左 10下都只係甩左少少, 抹 20下先得返 2成左右, 要用化妝棉係手敷一陣, 先完全卸乾淨



我眼係易出油, 有眼水, 仲係內雙眼皮, 用過好多 Eyeliner 都會甩, 包括好持久既 Gel Eyeliner
到試上眼啦, 平時好少畫咁粗既眼線, 但要因為影相要俾大家睇得清楚 d
有閃粉及亮片, 所以2款都上眼都唔會好實色, 而 Solone 係有 d 偏墨綠感



使用後數小時, Royal Lady 有 d 甩色, 仲印上左眼蓋位, 而 Solone 有少少溶左, 但都仲好清楚睇到條線, 同無甩左上眼皮



再睇下唔同各角度既使用前後啦
 

總結 : Solone 真係好好多, 雖然有少少溶, 但唔會印左上眼皮呢個好好, 因印左上眼都幾尷尬, 用埋眼影既話又好難抹走再補返眼影喎, 難怪咁多人讚, 真係好後悔無買多幾隻色, 而 Royal Lady 筆芯易斷, 成日要刨, 所以好快就用到好短啦, 仲估唔到佢有筆芯變硬問題, 回購度係零呀, 所以大家要認住個樣, 唔好買錯呀