黑龍堂深層潔面卸妝油 Hipitch Deep Cleansing Oil

卸妝產品都用過唔少種類, 但我比較偏愛卸妝油, 卸得乾淨又方便, 一支搞掂, 同埋我係混合偏乾皮膚, 所以無塞毛孔出粒粒既問題, 不過卸妝油用量都幾兇, 所以唔會多太貴既用, 多數用開架產品, 之前都用左好多支 Biore, 都想轉下, 見呢支平平地又大支, 黑龍堂啲產品口碑都唔錯, 就買黎試下啦

 

名 稱 : 黑龍堂深層潔面卸妝油 Hipitch Deep Cleansing Oil

價 格 : $58

容 量 : 250ml

產品介紹 : 

黑龍堂 (KOKURYUDO) 深層潔面卸妝油含有橘子油、桉樹油等天然潔膚成份，能迅速清除防水睫毛液、不脫色唇膏及防曬化妝品，保持肌膚潔淨亮澤。卸妝油通過皮膚敏感測試。

透明無色油狀,質地比一般卸妝油稀身, 所以用時會滴到手肘都係, 不過稀身就好推啲, 用量會省

搽左 Mascara, Liquid Eyeliner, Lip Stick, Blush, Foundation 係手, 試下個卸妝效果

按左 2-3下, Lip Stick, Blush, Foundation 呢 d 唔防水既彩卸已經甩晒, 得返 mascara 同 eyeliner 仲係度, 再按多 10下, 用左好多, 但都仲明顯見到 mascara 同 eyeliner

加少少水乳化, 都仲見到少少 mascara 同 eyeliner 喎, 但過水後就洗甩晒, 一 d 痕跡都無啦

總結 : 黑龍堂產品的確有保証, 初初用覺得好稀身, 有啲唔習慣, 但佢用量唔洗好多, 大約 3泵就夠, 而且加少少水就好易乳化, 過水後都好爽, 亦唔會塞毛孔, 令黑頭粉刺多左, 之前用得耐 biore, 就有呢個情況, 同埋佢卸得好乾淨, 以呢個價錢的確好抵用, 不過買時發覺, 唔同店舖買, 價錢都可以差幾遠, 所以最好格下價先