平 時冬天用開 Neutrogena Body Oil, 早排天氣又凍又乾, 要買返支黎看門口, 但去 Watsons & 萬寧都無減價, 網友 Sheep 用過彩豐幾款 Massage Oil 都 OK, 出開旺角就去彩豐睇下啦, 因為都幾多款, 所以之前上網睇過, 諗住買支 $65/500ml 既試下先啦, 點知上到去勁多人, 比平時多一倍人都有呀, 大廈管理仲特登封左兩部電梯淨係上 23樓咋, 上落都要排隊, 上到去見俾錢條龍都排到門口, 男友已經黑黑地面, 話幫我排隊先, 我去拎野, 所以都無細心揀, 聞過支 Rose Massage Oil 隻味 OK 就俾錢啦, 但呢個得 1000ml ($98), 返到屋企都諗下咁大支唔知點用, 跟住俾錢時見到平時放粉底個架度放左 D promo 野, 買 JimmBenny 香薰面霜 - 中性至油性, $58/60ml 送同系列既洗面奶 $38/250ml, 呢個 cream 之前都想試, 咁又順便買埋, 但個 cream 開左要 4個月內用完, 60ml 有 D 難度呀, 另外送左 eye cream, 白米磨砂, 水份面霜各2包。
之前都 Online 訂左支青瓜洗面奶 $36/500ml, 唔記得同佢影埋相添!!! 好鍾意佢個青瓜味, 
收 到 Body Shop email, 係 11/12 - 11/16 買任何 X'mas Set 有7折優惠, 見咁抵就去睇下啦, 見到有聖誕限量版紫洋梅 set 喎, 幾鍾意紫洋梅隻味, 舊年都想買呢個 X'mas set 架啦, 但二百幾唔捨得, 有7折就唔同講法啦, 計過7折後都平散買幾十蚊, 就敗左佢返黎啦, 原價 $259, 折實 $181.3。
紫洋梅身體潤膚霜 50ml
紫洋梅沐浴露 250ml
紫洋梅閃爍肥皂 100g
紫洋梅潤唇膏 10ml
紫洋梅沐浴球
另外都幾鍾意辣木味, 但 X'mas Set 唔抵買, 就平平地買舊皂試下。
終於用齊晒 11 款 mask 啦, 以下係產品介紹及用後感...
納豆奈米面膜 Natto Rejuvanating Mask
產品功效 : 高效銷水保濕
適用膚質 : 一般肌膚, 尤指暗沉缺乏彈力、極度缺水膚質
用後感 : 果然係我的美麗日記咁多款中最補濕既一款面膜, 敷完塊面好水嫩好滑, 皮膚有飲飽水既感覺, 效果維持到第二日都好滑。
Q10奈米面膜 Q10 Rejuvanating Mask
產品功效 : 柔白緊緻煥膚
適用膚質 : 一般肌膚, 尤鬆弛老化肌膚
用後感 : 塊 mask 好濕好多精華, 但唔知點解敷左 15mins 塊面有 d 痕, 再敷多 5mins 都係咁, 就用濕化妝棉抹面後搽 skincare, 無敏感, 幾補濕但塊面唔覺好滑, 今朝上妝都唔太貼, 同埋快出油, 補濕力唔持久。
冰沁活氧奈米面膜 Cooling Mask
產品功效 : 清涼醒膚, 舒緩保濕
適用膚質 : 一般膚質
用後感 : 敷果時好冰涼, 夏天敷應該會幾舒服, 好似放完入雪櫃咁, 塊 mask 好水幾補濕, 但唔持久, 敷完未搽 cream, 隔左陣 D 精華吸收晒後, 效果唔明顯。
蘋果多酚奈米面膜 Apple Polyphenol Mask
產品功效 : 緊緻修護毛孔
適用膚質 : 一般肌膚, 尤毛孔粗大膚質
用後感 : 一打開已經有好香既青蘋果味, 但 Mask Cutting 唔貼面, 敷完唔覺收毛孔, 但幾補濕, 塊面好滑。男友敷完毛孔明顯收細左, 護膚品真係人人用既效果都有唔同, 可能我毛孔太大, 已經收唔到啦 
普羅旺斯薰衣草奈米面膜 Provence Lavender Mask
產品功效 : 紓壓、柔膚、舒敏
適用膚質 : 一般膚質, 敏感肌膚亦適用
用後感 : 呢幾日轉天氣有少少敏感. 紅紅地咁敷呢個 mask 啱晒, 有淡淡既薰衣草味, 無唔舒服, 可能好補濕, 敷完面無咁紅, feel 到塊面好多水分, 唔錯。
清酒酒粕奈米面膜 Sake Yeast Mask
產品功效 : 白嫩無瑕, 晶瑩剔透
適用膚質 : 一般膚質 (敏感性肌膚請經肌膚測試後再使用)
用後感 : 幾勁酒精味, 敷完好爽唔 lup, 但無乜特別感覺。
珍珠粉奈米面膜 Pearl Powder Mask
產品功效 : 潤白, 滋養
適用膚質 : 一般膚質, 尤暗沉、受損肌膚
用後感 : 最多精華既一款面膜, 敷左 30mins mask 仲好濕, 敷後膚色有少少白左, 補濕度中等, 維持唔到去第二朝啦。
紅酒多酚奈米面膜 Red Vine Mask
產品功效 : 白晳, 緊實, 抗氧化
適用膚質 : 一般肌膚, 尤鬆弛暗沉肌膚
用後感 : 好香提子(紅酒)味, 好補濕, 敷完塊面真係無咁暗沉, 有光澤左, 好滑, 搽 skincare 都吸收得快左, 第二朝皮膚都 keep 到好滑, 怪不得大 S 咁推呢款 mask 啦。
保加利亞玫瑰奈米面膜 Bulgarian White Rose Mask
產品功效 : 清 . 透 . 淨 . 白
適用膚質 : 一般肌膚, 尤黯沉、缺光澤肌膚
用後感 : 拆開聞唔到有玫瑰味, 精華好似無其它 mask 咁多, 敷左 30分鐘塊 mask 開始乾, 可能之前無敷深層清潔面膜, 無咁吸收, 敷完好似無乜特別感覺。
黑珍珠奈米面膜 Black Pearl Mask
產品功效 : 極致潤白、彈力透亮
適用膚質 : 一般膚質, 特推薦缺乏光澤與彈力肌膚
用後感 : 無香料, 面膜好多精華, 敷 20mins 後還很濕, 按摩待精華完全吸收, 很水潤唔 lup, 亮白左, 用濕化妝棉抹面後, 一個鐘無搽 skincare 都唔覺乾。
蘆薈奈米面膜 Aloe Mask
產品功效 : 保濕, 潤澤
適用膚質 : 一般肌膚, 尤乾燥、受損肌膚
用後感 : 有少少香味, 補濕都唔錯, 但敷完唔覺有咩特別。
試用後覺得最好用係紅酒, 納豆, 黑珍珠。
早幾日同男友行旺角格仔舖, 見到呢個小雲散銀包, 好可愛忍唔住買左, 另外仲有小吉、宇宙大王, 但唔知點解無千平博士, haha, 可能佢塊面太大, 要用好多布, over budget 呀, 哈哈哈!!!
10月尾參加左 she.com 既 「she critiques 美容大賞 2008」, 投票後會自動參加抽獎, 每日有17份 Diamond 級禮品送出, 參加左三年, 第一次中獎咋, 有 Clinique 新出 Superdefense spf25 pa+++ 及 Super Rescue Night Moisture, 價值 $730 架, 仲額外送左 Asience Shine Therapy Sampoo & Conditioner 各2包, 都唔錯呀。
